ရိုးမရေဒီယိုမဂ္ဂဇင်း
ခက်ခဲကြမ်းတမ်းလှရေ ငြိမ်းချမ်းဖို့ခရီးရှည်ကြီးမှာ လူအများက လေးစားအားထားရသူ၊ ငယ်ရွယ်နုပျိုရေ အချိန်တိကို ပီးဆပ်ရင်း ငြိမ်းချမ်းရေးရဖို့ ကြိုးစားနေရေ ရခိုင်အမျိုးသမီးတစ်ယောက်အကြောင်း တင်ဆက်ပီးလားပါမယ်။ သူကတော့ ရခိုင်အမျိုးသမီးများအစည်းအရုံး ဒုဥက္ကဌ ဒေါ်စောစံငြိမ်းသူဖြစ်ပါရေ။ ဘင်္ဂလားဒေ့ရှ့် နယ်စပ်မှာ အခြေစိုက်ရေ ရခိုင် အမျိုးသမီးများ အစည်းအရုံးကို ၂၀၀၁ ခုနှစ်မှာ စတင်ဝင်ရောက်ခသူလည်းဖြစ်ပါရေ။
အမျိုးသမီးများ အဖွဲ့ချုပ် မြန်မာနိုင်ငံကပီးရေ ငြိမ်းချမ်းရေးဆရာဖြစ်သင်တန်းကို တက်ရောက်ခရာကနေ အစပြုပနာ ငြိမ်းချမ်းရေးခရီးထဲ ပါဝင်ခစွာပါ။
“ပထမဆုံးအနေနဲ့ အကျွန်က ငြိမ်းချမ်းရေးပညာသင်ပီးဖို့ဆိုရင် အကျွန်အနေနဲ့က အယုံ အကြည် မရှိဘူးပေါ့။ အမှန်ပင် ငြိမ်းချမ်းရေးပညာပီးသင်တန်းကို တက်ပြီးရေနောက်မှာ ဒေချင့်က ငြိမ်းချမ်ရေး ဆိုရေ အနှစ်သာရကို ပိုပနာ နားလည်လာခရေဆိုတော့ နေ့အတူတူက မငြိမ်းချမ်းမူတိနဲ့ ခံစားနေရရေ ကြားထဲ ကနေ လူတစ်ဦးတစ်ယောက်ချင်းစီ အနေနဲ့ ငြိမ်းချမ်းရေးကို အမြဲတမ်း တည်ဆောက်နေဖို့ လိုရေ ဆိုရေအပိုင်းကို နားလည်လာခရေ။ ပြီးတော့ ငြိမ်းချမ်းရေးရဲ့ အနှစ်သာရပေါ့နော် ငြိမ်းချမ်းရေးရဲ့ တန်ဖိုး ဆိုစွာကို ပိုပြီးတော့ သိမြင်လာခရေ။ “
ရခိုင်အမျိုးသမီးများ အစည်းအရုံးကဦးဆောင်ပြီးတော့ ကမ္ဘာ့ကုလသမဂ္ဂ ၊ အီးယူနိုင်ငံနဲ့ အာဆီယံ နိုင်ငံတိကို လားရောက်ပြီး နိုင်ငံတွင်းနဲ့ နယ်စပ်ဒေသတစ်လျှောက် ဒုက္ခမျိုးစုံခံစားနေတာတိကို တင်ပြခရေပိုင် နယ်စပ်ဒေသက ဒုက္ခသည် အမျိုးသမီးတိကိုလည်း ငြိမ်းချမ်းရေးနန့် ပတ်သက်ပြီး ပညာပီးလုပ်ငန်းတိ လုပ်ဆောင်ပီးခပါရေ။
“အကျွန်ရို့ပြည်သူတိအနေနဲ့ တစ်ခါတစ်ခါကျလို့ရှိရင် ကိုယ်ရို့က မငြိမ်းချမ်းမှုကို ဇာကြောင့် မငြိမ်းချမ်း ရလဲ ဆိုရေဟာမျိုးကို စဉ်းစားချက်က အားနည်းလာရေ။ ဇာဖြစ်လို့လဲဆိုတော့ ဘ၀ကံ အကြောင်း တရား မကောင်းခလို့ မငြိမ်းချမ်းရတာပေါ့နော်။ ဇာကြောင့်မငြိမ်းချမ်းမှုတိ ပြည်သူလူထုတိ ခံစားနေရစွာလဲ ဆိုရေဟာကို သိနိုင်စီဖို့အတွက်ကို အကျွန်ရို့က စည်းရုံးမဲဆွယ်ရေးကနေ တစ်ဆင့် ပြည်သူတိက အမှန်တကယ် လူအခွင့်အရေးချိုးဖောက်မူတိနဲ့အတူ မငြိမ်းချမ်း တိရှိနေရေ ဆိုစွာကို ပြည်သူတိ ကိုယ်တိုင် နားလည်သိမြင်နိုင်ဖို့အတွက် အသိပညာပီးရေ စည်းရုံး လှုံဆော်မူတိကို တစ်ပတ်က ပြည်တွင်းပြည်ပမှာလုပ်ရေ။”
ဒေါ်စောစံငြိမ်းသူစွာ ပင်ကိုဗီဇအရ အေးအေးဆေးဆေးနေတတ်သူဖြစ်ပေမဲ့ ငြိမ်းချမ်းရေးလုပ်ငန်းစဉ်တိရဲ့ ရေယာဉ်ကြောမှာ မြောပါပီးရေနောက်တော့ နိုင်ငံအတွက် ပြည်သူ့အတွက် လုပ်ဆောင်ချင်စိတ်တိ ပြင်းထန်ခသူ တစ်ယောက်ဖြစ်လာပါရေ။ လူထုတိုက်ပွဲဖော်ဆောင်ရေး ကော်မတီတိ၊ တခြား လက်နက်ကိုင်အဖွဲ့တိနဲ့ ပေါင်းစည်းထားရေ နိုင်ငံရေးတပ်ပေါင်းစုတိမှာလဲ ကိုယ်စားလှယ် အနေနဲ့ပါဝင်ပြီး ငြိမ်းချမ်းရေးအတွက် သူ တတ်စွမ်းသမျှ ကြိုးစားခသူပါ။ ယေကေလေ့ သူ့ အသက်အရွယ်ငယ်ရွယ်မှုကြောင့် ငြိမ်းချမ်းရေးလုပ်ငန်းစဉ်က သဘာရင့်သူတိ၏ မယုံကြည်မှုတိ တိုက်ခိုက်မှုတိကိုလဲ ခံခရသူဖြစ်ပါရေ။
“စပြီးကေ ဆရာဖြစ်သင်တန်းဆင်း၊ ဆင့်ပွားသင်တန်းပီးဖို့ဆိုပြီးခါမှ ဘင်္ဂလာဒေ့ရှ့်ဒေသမှာ အကျွန်က နီးစပ်ရာ နိုင်ငံရေးပါတီအဖွဲ့အစည်းထဲက ကိုယ်စားလှယ်တိကိုဖိတ်ရေ။ အဲ့တုန်းကဆိုကေ အကျွန်က အရမ်းငယ်တော့လေ စောစံငြိမ်းသူက ငယ်ငယ်ရွယ်ရွယ်နဲ့ပေါ့ ဆင့်ပွားသင်တန်းကိုပီးဖို့ ဇာ သင်စရာလိုလဲပေါ့။ ဖိတ်ကြားရေအချိန်မှာ ယင်းပိုင် ပြန်တုန့်ပြန်စွာရှိရေ။ မလိုဘူးပေါ့ ငြိမ်းချမ်းရေးဆိုတာ အရာရာပြည့်စုံပြီ။ ကိုယ်လိုရေအရာပြည့်စုံယာ ဆိုလို့ရှိကေ ဒါငြိမ်းချမ်းရေးကို သင်တန်းတက်နေစရာမလိုဘူးပေါ့နော်။ ယင်းမှာ ယင်းမျိုးတုန့်ပြန်မူတိကို ကြုံတိ့ခရရေ။ နောက် တစ်ပတ်မှာလဲ အကျွန်ရို့ နယ်စပ်ဒေသမှာ ရှိရေ လက်နက်ကိုင်အင်အားစုတိက အကျွန်ကို ဇာပြောလဲဆိုတော့ စောစံငြိမ်းသူ ဆိုတာ လက်နက်ကိုင်တိုက်ပွဲကို ဆန့်ကျင်ရေသူဖြစ်ရေ။ ယင်းကြောင့်မို့သူကို မထောက်ခံပါနဲ့ပေါ့ သူပီးရေသင်တန်းတိကိုလဲ မတက်ပါနဲ့ပေါ့ သူစကားကိုလဲနားမထောင်ပါနဲ့ ဆိုရေ လက်နက်ကိုင် အဖွဲ့အစည်းက တစ်ချို့ပုဂ္ဂိုလ်တိ တိုက်ခိုက်ခြင်းကိုလည်းခံခရပါရေ။ “
ပြည်ပနိုင်ငံမှာ နှစ်အတော်ကြာ ဖြတ်သန်းပနာ ပြည်တွင်းကို ပြန်ဝင်လာရေအချိန်မှာတော့ ရခိုင်ပြည်နယ်အတွင်းက မြို့နယ် ၁၈ ခုမှာ ငြိမ်းချမ်းရေးပညာပီးလုပ်ငန်းတိ လုပ်ကိုင်ခပါရေ။ လုပ်တာနဲ့ ပက်သက်ပနာလည်း အသက်အန္တရာယ်ကို ခြိမ်းခြောက်စွာတိနဲ့ပါ ရင်ဆိုင်ခရပါရေ။
“အကျွန်မှာ ၀င်လာရေ အချိန်မှာဆိုလို့ရှိရင်ပြည်သူလူထုတိက အကြမ်းဖက်မူတိကို အကြမ်းဖက်မူနဲ့ပါ တုန့်ပြန်ရဖို့လို့ နားလည်ထားရေ။ ဆိုကေ အကျွန်ရို့အမြဲတမ်းပဲ သူတစ်လှည့်ကိုယ်တစ်လှည့် အဲ့လိုမျိုး အကြမ်းဖက်နေဖို့ဆိုလို့ရှိရင် အကြမ်းဖက်မှု သံသရာက ဇာခါလေ့သင့် ပြီးဆုံးဖို့ မဟုတ်။ ယင်းတွက် ရခိုင်အမျိုးသမီးများ အစည်းအရုံး ပြည်တွင်းရေးကို စ၀င်လာရေ အချိန်မှာ လူ့အခွင့်အရေးနဲ့ ငြိမ်းချမ်းရေး ပညာပီးတိကို စပြီးတော့လုပ်ရေ။ စပြီးတော့လုပ်ရေအချိန်မှာ အကျွန်ကို သတ်ဖို့ဆိုရေ ခြိမ်းခြောက်ခြင်းကိုပါ ခံခရရေ။ အခုပဲလာသတ်ဖို့ဆိုရေဟာတိကိုလဲ ခြိမ်းခြောက်ခြင်းခံရရေ။ ယေလေ့သင့် လာခပါ အရင်ဆုံးအကျွန်နဲ့ပဲ အရင် စကားပြောကြည့်ပါပေါ့။ အဲ့လိုမျိုးစကားနဲ့ပဲ တဖြည်းဖြည်းနဲ့ ဖြေရှင်းလားခရရေ အကြိမ်ပေါင်းလဲ မနည်းပါဘူး။ “
သူက ငြိမ်းချမ်းရေး လုပ်ငန်းတိအပေါ် စိတ်ရောကိုယ်ပါ နှစ်ပြီး လုပ်ကိုင်နေစွာကြောင့် မိသားစုနဲ့လဲ နှစ်ရှည်လများစွာ ဝေးပြီး နေထိုင်ခရသူဖြစ်ပါရေ။ မွေးချင်းရှစ်ယောက်ရှိရေ အထဲမှာ အငယ်ဆုံးလဲ ဖြစ်တေပိုင် မိခင်ဖြစ်သူကလဲသူ့အသက် ၁၁ နှစ်လောက်ကထဲက ဆုံးပါးလားခပါရေ။ မိသားစုရဲ့အဝေးမှာ အများဆုံး နေရတဲ့အတွက် အားငယ်မှုချေတိကလဲ ရှိလို့နေပါရေ။
“အကျွန် ၂၁ ကနေ စပြီးတော့ အိမ်ပြန်လာရေ ၂၀၁၃ အချိန်ထိ မိသားစုနဲ့ ဝေးကွာနေခရေ။ ပြီးတော့ ဆက်စပ် ဆက်သွယ်မှု ဆိုစွာလဲမရှိဘူး လုပ်လို့ရရေ အနေထားမှာလည်းမရှိဘူး မိသားစုနဲ့ အဆက်သွယ် မရှိခဘူး။ ၂၀၀၂ မှာ ဆိုင်ကယ် အက်ဆီဒန့် ဖြစ်ရေပေါ့။ ထိုင်းနိုင်ငံမှာ။ ဆေးရုံရောက်လားရေ ဆေးရုံရောက်လားတော့ အဲ့အချိန်မှာပဲ ဆေးရုံမှာကတော့ ကိုယ့်အလုပ်နဲ့ကိုယ်ဆိုတော့ ကိုယ့်ရဲ့ အပေါင်း အဖော်တိက လာပြီး စားစရာတိ လာပီးလာချ ထားခလိုက် ပြီးကေ ပြန်လားလိုက်။ ယင်းပုံစံမျိုးနဲ့ဆို ကိုယ့်အနားမှာ တစ်ယောက်မှမရှိ။ ရုံးပြန်ကြရေဆိုတော့လေ ညအိပ်ချိန်မှ ပြန်လာရေဆိုတော့ ဆေးရုံမှာ တစ်ယောက်တည်းပဲ အဲ့အချိန်မှာတော့ တော်တော်လေးသတိရခရေ အပိုင်းတော့ရှိခပါရေ။ “
တိုင်းရင်းသားလက်နက်ကိုင် ခေါင်းဆောင်တိပါဝင်ရေ လောခီးလာထိပ်သီးညီလာခံကိုတော့ သူ မေ့နိုင်ဖို့ မဟုတ်ပါ။ ညီလာခံကျင်းပနေချိန်နဲ့ တပြိုင်တည်းမှာ ဖခင်ဖြစ်သူလည်းမ ကျန်းမမာ ဖြစ်နေခပါရေ။ ယေကေလေ့သင့် အလုပ်တာဝန်တိကို ဦးစားပီးရဖို့ ဆိုရေ ဖခင်ဖြစ်သူ စကားအတိုင်း မကျန်းမမာဖြစ်နေရေ ဖခင်ကိုထားခပြီး ငြိမ်းချမ်းရေး တာဝန်ထမ်းရွက်ခသူ တစ်ယောက်ပါ။
“နောင်တလို့ဆိုရှိကေလဲ မှားဖို့မထင်ပါဘူး။ အဖေအသက်ကို ၃ မိနစ်ပဲမှီရေ။ အဲ့ဒီ ၃ မိနစ်မှီလိုက်ရေ အချိန်မှာ ဟို အဖေတစ်ခု ပြောခတာရှိရေ။ ယေလေ့သင့်အကျွန် မသိယာ။ စကားတစ်ခွန်းမှ မပီတော့ အဖေ နောက်ဆုံး ပြောခရေစကားကို အကျွန် မရခလိုက်။ ယင်းကိစ္စမှာ အဖေ ဇာတိ့မှာခလိုဆိုရေ ဟာကို ပြီးတော့မှ စိတ်မကောင်းဖြစ်မိတာတိလည်းရှိပါရေ။ အဓိကက လူမူအသိုင်းအ၀ိုင်းတစ်ခု ကမ္ဘာကြီးတစ်ခု ငြိမ်းချမ်းဖို့ဆိုရေဟာက လူတစ်ဦးတစ်ယောက်ချင်းမှာ အခြေခံရေဆိုစွာကို ဒေကမ္ဘာပေါ်မှာရှိနေကြရေ လူသားတစ်ယောက်ခြင်းဆီက လက်ခံဖို့လိုရေ။ ငြိမ်းချမ်းရေးကို ဖော်ဆောင်နိုင်ရေထိကို ငြိမ်းချမ်းရေးကို တည်ဆောက်နိုင်ရေ နှလုံးသား အဲ့ဒီဟာတိကို အမြဲတမ်းရှိနေဖို့လိုရေ။ ဒေချင့်တိ့ရှိနေမှ ဒီလူမူအသိုင်းအ၀ိုင်းက ငြိမ်းချမ်းမှာဖြစ်ရေ။ လူတစ်ယောက်မှာ ကျင့်ကြံရမယ့် ၀တ္တရားပေါ့။ လူတစ်ယောက်မှာ ငြိမ်းချမ်းရေး အတွက် ကျင့်ကြံရဖို့ ၀တ္တရားတိကို နေ့စဉ်နှင့် အမျှကျင့်ကြံနေမှ နေစဉ်နဲ့အမျှလုပ်နေမှ အေလိုမျိုး ငြိမ်းချမ်းရေလူမှုကမ္ဘာကို အကျွန်ရို့ တည်ဆောက်နိုင်မှာဖြစ်ရေ။”
သူကိုယ်သူထက် လူအများကို ချစ်သူ မိသားစုအဖို့ထက် ငြိမ်းချမ်းဖို့ကိုဦးစားပီးသူ ဇာတိ ပင်ပန်းခက်ခဲနေပါစီ။ နိုင်ငံ့အတွက် အမျိုးသမီးတိအတွက်ဆို ရှေ့ဆုံးကရှိလားဖို့ အမျိုးသမီးတစ်ဦးပါ။
534 total views, 1 views today