ကိုအောင်၊ ရိုးမရေဒီယိုမဂ္ဂဇင်း

အေတစ်ပတ်မှာ မြန်မာနိုင်ငံ အနောက်ဘက်အစွန်ဆုံးက ဒေသတစ်ခုဖြစ်တေ မောင်တော ဒေသ မေယုတောင်တန်းထက်က ပျောက်ကွယ်လားရေ မီးရထားလမ်းတစ်ခုအကြောင်းကို ရထားလမ်း နှစ်တစ်ရာပြည့် အထိမ်းအမှတ်အနေနန့် တင်ဆက်ပီးလားဖို့ ဖြစ်ပါရေ။

စစ်တွေမြို့ကနိ ဘူးသီးတောင်နန့် မောင်တောကို လားလာဖို့ ဆိုကေ ဒေနိ့ အချိန်ထိ ရီလမ်းခရီးတစ်ခုကိုရာ အားထားနီရဆဲ ဖြစ်ပါရေ။ စစ်တွေမြို့နိ မိုင် ၈၀ အကွာအဝီးမှာ ရှိရေ ဘူးသီးတောင်မြို့ကို သဘောင်္နန့် လားရောက်ပြီးမှ ကားလမ်းက တစ်ဆင့် မောင်တောမြို့ကို လားရောက်နိုင်ပါရေ။

အခုအချိန်မှာ ရသေ့တောင် ဘူးသီးတောင်လမ်းကနိ လာရောက်နိုင်ရေပိုင် အငူမော်မြစ်ကို ဇက်နန့် ဖြတ်ကူးပနာ မောင်တောမြို့ကို လာရောက်နိုင်ကေလေ့သင့် ခရီးကြမ်းတမ်း ခက်ခဲနိသိ့ရေအတွက် ရီလမ်းခရီးကတော့ လူအများဆုံး အသုံးပြုရေ ခရီးလမ်းတစ်ခု ဖြစ်နိပါသိရေ။

ဘူးသီးတောင်မြို့ကို သင်္ဘောဆိုက်ရောက်လို့ ကုန်းထက်ကို တက်ဗျာလ်ဆိုစွာနန့် တွီ့ရေ ရပ်ကွက်ကို အများစုကတော့ သင်္ဘောဆိပ်လို့ အလွယ်တကူ ခေါ်ကတ်ကေလေ့သင့် အဂင့် ပြန်တမ်းဝင် နာမေကတော့ မီးရထားဆိပ်လို့ နာမည်တွင်ပါရေ။ ဇာကြောင့် သင်္ဘောတိ့ ဆိုက်ကပ်တေ နီရာကို မီးရထားဆိပ်လို့ ခေါ်ကတ်လဲ ဆိုစွာ စိတ်ဝင်စားဖို့ ကောင်းပါရေ။

“ တချိန်က အင်္ဂလိပ်တိ့ မြန်မာနိုင်ငံကို အုပ်ချုပ်တေအချိန်က အိန္ဒိယက လာရေ မီးရထားတိ့ အေ ဘူးသီးတောင် မီးရထားဆိပ်မှာ ဆိုက်ကပ်ခရေအတွက် မီးရထားဆိပ်ရပ်ကွက်လို့ ဖြစ်လာပါရေ” လို့ မီးရထားဆိပ်ရပ်ကွက် အုပ်ချုပ်ရေးမှူး ဦးအေးမောင်က ရှင်းပြပါရေ။

ဇာအချိန်ဇာကာလက ဇာအချိန်ကာလထိ မီးရထားတိ့ ပြီးဆွဲခစွာလဲ။ အခု ယင်း မီးရထားလမ်းက ဇာပိုင် ပျောက်ကွယ်လားလဲ၊ မီးရထားလမ်း ရှိခဖူးရေ အထောက်အထားတိ့က ဇာမှာလဲ။ ဇာအရာတိ့လဲ စရေ အကြောင်းအရာတိ့ကို ဘူးသီးတောင် မောင်တောက ဒေသခံတိ့ကို မိန်းမြန်းတင်ဆက်ပီးလားဖို့ ဖြစ်ပါရေ။

ဘူးသီးတောင် မောင်တောမြို့နှစ်ခု ဆက်သွယ်ဖို့အတွက် တစ်ခုတည်း ဆက်သွယ်ရေးလမ်းကြောင်း ကားလမ်းကိုရာ အသုံးပြုနိရပြီးကေ ၁၆ မိုင် ရှည်ရေ လမ်းစွာ အရင်က မီးရထားလမ်းတစ်ခု ဖြစ်ခပါရေ။

တရားလွှတ်တော် ရှေ့နေတစ်ယောက်လဲ ဖြစ်ပနာ မြို့မိမြို့ဖတစ်ယောက်လဲ ဖြစ်တေ အသက် ၆၆ နှစ်အရွယ် ဦးအောင်ကျော်ညွန့်စွာ မောင်တောမြို့ ဇာတိ ဖြစ်ပနာ အဂုအချိန်ထိ မောင်တောမြို့မှာရာ နီထိုင်ပါရေ။ သူ သိဟိ့ထားရေ မီးရထားလမ်းအကြောင်းကို ဂုပိုင်ပြောပြပါရေ။

“ဘူးသီးတောင် မောင်တောလားရေ လမ်းကတော့ ကတ်တရာလမ်းဖြစ်နိပါဗျာလ်။ ယင်း ခွဆုံကနိပနာ ရွှေဇားတံထားအထိ ကျောက်တုံးတိ့နန့် ယင်းရထားလမ်းကို လုပ်ခရစွာပါ။ ယင်းတံထား တစ်ဖက်ကိုလည်း ကျောက်တုံးတိ့၊ ကျောက်တုံးတိ့က ဇာလောက်ထိရောက်လဲဆိုကေ ဟိုကညင်ချောင်းထိ ရောက်လားရေ။ ယင်း ကညင်ချောင်းစွာ ရထားလမ်းအစလို့ ပြောရေ။ ယင်းတံတားစွာ ရထားဖြတ်တေ တံထား။ ဘူတာအစက ကညင်ချောင်းမှာ ဘူတာစရေ။ ယင်းက လားပနာ ဘူးသီးတောင် မောင်တော ကတ်တရာလမ်းဖြစ်နိရေ လမ်းတစ်လျှောက်စွာ ရထားလမ်းဗျာလ်”

ယင်း ရထားလမ်းကို တည်ဆောက်ဖို့အတွက် အာရကန် ဖလော်တီလာ ကုမ္ပဏီက မာတင်ကုမ္ပဏီလုပ်ငန်းကို အပ်နှံ့ခနာ ၁၉၁၆ ခုနှစ်မှာ စတင် ဖောက်လုပ်ခပါရေ။ ၁၉၁၈ ခုနှစ်မှာ ဖောက်လုပ်ပြီးစီးခပနာ ၁၉၂၆ ခုနှစ်ထိ မီးရထားပြီးဆွဲခရေလို့ မေယုဒေသအကြောင်း လေ့လာပနာ ဆောင်းပါးတိ့ ရီးနိရေ ဆရာ ဦးလှဖြူသန်းက ပြောပါရေ။

 548 total views,  1 views today