ထူး ၊ ရိုးမရေဒီယိုမဂ္ဂဇင်း
ကာယကံရှင် အလိုဆန္ဒမပါဘဲ အဓမ္မပြုကျင့်ခံခရရေ ရခိုင်မြောက်ပိုင်း ရသေ့တောင်မြို့နယ်၊ ဦးဂါကျေးရွာသူ အမျိုးသမီးရေ တရားမျှတမှုကို လိုလားနီပါရေ။
ပြီးခရေ ဇူလိုင်လ ၁၀ ရက်နိန့်က တိုင်ကြားထားရေ သူ့ အမှုကို ဒီဇင်ဘာလ ဒုတိယအပတ် ၁၁ ရက်နိန့်မှာ စီရင်ချက် ချမှတ်ဖို့ယာဖြစ်ပါရေ။ စီရင်ချက် ချမှတ်ဖို့ ၆ ရက်အလို ဒီဇင်ဘာလ ၅ ရက်နိန့်က မိန်းမြန်းရေခါ ကာယကံရှင်က သူ၏ လိုလားမှုကို အေပိုင် ပြောဆိုလာပါရေ။
“အမှုကို အရင်ဆုံးပြီးစီချင်နီပါယာ။ အပြစ်ရှိရေလူကို ပြစ်ဒဏ်ပီးကေ အကျွန်လည်း ကျေနပ်ပါရေ။” လို့ နစ်နာရေ ရသေ့တောင်သူ အမျိုးသမီးက Arakan Yoma ကို ပြောပါရေ။
ပြီးခရေ ဇွန်လ ၂၉ ရက်နိန့် ညက ရခိုင်ပြည်နယ်မြောက်ပိုင်း ရသေ့တောင်မြို့နယ် ဦးဂါကျေးရွာက ဒေါ်(—-)၊ အသက် (၃၆) နှစ်၊ သား၊ သမီး (၄) ဦးရို့၏ မိခင်ရေ အလိုမတူဘဲ အဓမ္မပြုကျင့်ခြင်းခံခရပါရေ။ အခင်း ဖြစ်ပွားခရေ နေရာစွာ အေအေနဲ့ တပ်မတော်ရို့ တိုက်ပွဲဖြစ်ပွားနီရေ နေရာထဲက တစ်ခုလည်း ဖြစ်ပါရေ။
နစ်နာသူက သူရို့ ပုန်းအောင်းနီရေ နေအိမ်ကို တပ်မတော်သားတိက ရောက်ဟိလာပနာ ယင်းအထဲက (၃) ယောက်ရေ သူ့ကို ဆွဲခေါ်ပြီး အဓမ္မပြုကျင့်ခရေလို့ ပြောဆိုထားပါရေ။ ယေပြီးကေ ယင်းမမဧ့ သမီးဖြစ်တေ အချေမွီးထားစွာ ၆ ရက်ယာဟိ့သိရေ မတွင်းနီ (မီးတွင်းနေ) သူကိုလည်း အရာလေ့ ပြုကျင့်ဖို့ ကြိုးစားခရေ ပြောပါရေ။
ယင်းနောက် ဇူလိုင်လ ၁၀ ရက်နိန့် မှာ ကာယကံရှင်နဲ့ သမီးဖြစ်သူရို့ရေ စစ်တွေမြို့ကို ရောက်ရှိလာကပ်ပြီး လူမှု အဖွဲ့အစည်း တချို့၏ အကူအညီနဲ့ စစ်တွေမြို့ အမှတ်(၁) ရဲစခန်းမှာ အမှုဖွင့်ခပါရေ။ အမှု ဖွင့်ပြီး ချိန်မှာ တပ်မတော်က ယင်းဖြစ်စဉ်ကို ငြင်းဆိုခပါရေ။ ယေလေ့သင့် ကျူးလွန်လူတိကို စစ်ဆေးပြီးရေခါ တပ်မတော်က ဒေဖြစ်ရပ်ရေ နစ်နာသူပြောကြားခစွာပိုင် မှန်ကန်ရေလို့ ဝန်ခံလာခပါရေ။
ဒီဇင်ဘာလ ၃ ရက်နိန့်မှာ အမှုကို စစ်တွေမြို့က စစ်ဘက်ဆိုင်ရာ တရားရုံးမှာ ပထမဆုံး ရုံးတင် စစ်ဆေးခပြီး ကာယကံရှင်နဲ့ ရှေ့နေရို့က ကျူးလွန်သူတိကို တပ်မတော် အက်ဥပဒေပုဒ်မ ၃ ခုနဲ့ တရား စွဲတင်ခပါရေ။
ယင်းပုဒ်မတိ ထဲ့က နယ်ဖက်ပြစ်မှု ၃၇၆၊ တပ်မတော်အက်ဥပဒေပုဒ်မ ၇၁၊ ၄၇(၁)၊ နယ်ဖက်ပြစ်မှု ၃၆၆၊ တပ်မတော် အက်ဥပဒေပုဒ်မ ၇၁၊ တပ်မတော် အက်ဥပဒေပုဒ်မ ၃၅ (င) စရေပုဒ်မတိ ပါဝင်ရေလို့ အမှုကို လိုက်ပါဆောင်ရွက်ပီးနီရေ ဥပဒေရေးရာ ကုစားရေးရုံးက တရားလွှတ်တော်ရှေ့နေ ဒေါ်မြသူဇာက ပြောပါရေ။
ဒေါ်မြသူဇာက “ကျူးလွန်ခံရရေ အမျိုးသမီး ရှေ့နေတစ်ယောက်အနေနဲ့ သူ့ကို တရားမျှတမှု ရရှိစီချင်ပါရေ။ ကျူးလွန်ခံရရေ ပြစ်မှုနဲ့ ညီမျှရေ ပြစ်ဒဏ်ကို ရရှိစီချင်ပါရေ။ ရပါစီလို့လည်း တောင်းဆိုပါရေ။”လို့ ပြောပါရေ။
စွဲချက် တင်ထားစွာထဲက ပုဒ်မ ၃၅ (င) စွာ ထောင်ဒဏ် ၁၄ နှစ်ထိချမှတ်နိုင်ပနာ ပုဒ်မ ၇၁ ကို ကျူးလွန်ရေလို့ ထင်ရှားကေ ထောင်ဒဏ် ၇ နှစ်နဲ့ ၄၇ (၁) က ၂ နှစ်အထိ ချမှတ်နိုင်ရေလို့ သိဟိ့ရပါရေ။
လက်ရှိမှာ နစ်နာသူ အမျိုးသမီးရေ လူမှုအဖွဲ့အစည်းတချို့ဘားက အကူအညီနဲ့ နီထိုင်လို့ရှိနီပြီးကေ လင်ယောင်္ကျားနဲ့ ဆွေးမျိုးသားချင်းရို့ဘားမှာ အထင်မြင်လွဲမှုကို ခံနီရရေလို့ ဝမ်းနည်းပနာ Arakan Yoma ကို ရင်ဖွင့် ဖြေကြားခပါရေ။
555 total views, 1 views today