Arakan Yoma|
မကြာခင် ကျင်းပဖို့ ဟိမ့်နိန်ရေ အထွေထွေရွေးကောက်ပွဲကို ယှဉ်ပြိုင်ဖို့ ရခိုင်ပြည်နယ်အတွင်းက နိုင်ငံရေး ပါတီတချို့ စတင်ပြင်ဆင်နိန်ကပ်ပါယာ။
ရခိုင်အမျိုးသားပါတီဆိုကေ ကိုယ်စားလှယ်လောင်းတိ စိစစ်ရွီးချယ်ရေးကော်မတီတိ ဖွဲ့စည်းဖို့ ဗဟိုကနိန် မြို့နယ်တိကို ညွှန်ကြားထားပြီးယာ ဖြစ်ပါရေ။ ကော်မတီမှာ ကိုယ်စားလှယ်လောင်းအဖြစ် ဝင်ပြိုင်ဖို့ အဆိုပြုဖို့လူ မဟုတ်ဘဲ ပါတီဝင် ငါးဦးနဲ့ ဖွဲ့စည်းရစွာဖြစ်တေပိုင် ယင်းစာရင်းတိကိုလည်း ဇွန် ၂၅ နောက်ဆုံးပေးပို့ကပ်ဖို့ ရခိုင်အမျိုးသားပါတီ ဗဟို အထွေထွေအတွင်းရေးမှူး ဦးခိုင်ပြည်စိုးက ဇွန် ၁၂ ရက်မှာ လက်မှတ်ရွီးထိုး ထုတ်ပြန်ခစွာပါ။
အမျိုးသားဒီမိုကရေစီအဖွဲ့ချုပ်က ရခိုင်ပြည်နယ်အတွင်းမှာတော့ခါ ပြည်နယ်ဝန်ကြီးချုပ် ဦးညီပုနဲ့ စည်ပင်ဝန်ကြီး ဦးဝင်းမြင့်ရို့က ထပ်မံယှဉ်ပြိုင်ဖို့ ပြောထားပါရေ။ သူရို့ အယင် ၂၀၁၅ ရွေးကောက်ပွဲတုန်းက ယှဉ်ပြိုင်ခရေ မဲဆန္ဒနယ်တိကယာ ဖြစ်တယ်လို့ ဆိုကေလေ့ ပါတီဗဟိုကနိန် အတည်ပြုဖို့ လိုအပ်နိန်ပါသိမ့်ရေ ဆိုပါရေ။
တနိုင်ငံလုံးအတိုင်းအတာနဲ့ ကျင်းပဖို့ အထွေထွေရွေးကောက်ပွဲ ၂၀၂၀ ကို နိုဝင်ဘာမှာ လုပ်ဖို့ ပြည်ထောင်စု ရွေးကောက်ပွဲ ကော်မရှင်က အတိအလင်း ကြေညာထားပြီးယာ ဖြစ်ပါရေ။ ယကေလေ့ ရခိုင်ပြည်နယ်နဲ့ “ဝ” ဒေသမှာ ကျင်းပဖြစ်မဖြစ်ကို တစ်ယောက်ကလေ့ တိတိပပ မပြောနိုင်သိမ့်ဆိုစွာကို တွိ့ရကေလေ့ ကျင်းပဖြစ်ဖို့ ကြိုးစားနိန်ကပ်တေ သဘောပါ။
ယင်းပိုင် အခြေနိန်တိကြောင့် ရခိုင်ပြည်နယ်အတွင်းက ကျန်တချို့ပါတီတိကတော့ခါ ပြင်ဆင်မှု စတင်ဖို့ အချိန်ယူနိန်ကပ်ရရေလို့ ဆိုပါရေ။
515 total views, 1 views today