Arakan Yoma|
၂၀၂၀ ပြည့်နှစ်၊ ဧပြီလ ၁၇ ရက်နိန့်မာကျရောက်တေ မြန်မာ့နှစ်သစ်ကူးမှာ နိုင်ငံတော်သမ္မတ ဦးဝင်းမြင့်က မြန်မာနိုင်ငံတဝမ်းလုံးက အကျဉ်းထောင်အသီးသီးမှာ ပြစ်ဒဏ်ကျခံနီရရေ အကျဉ်းသား ၂ သောင်းကျော်ကို လွတ်ငြိမ်းချမ်းသာခွင့်ပီးလိုက်ပါရေ။
မြန်မာနိုင်ငံတဝမ်းလုံးက အကျဉ်းထောင်အသီးသီးမာကျခံနီရရေ မြန်မာနိုင်ငံသားအကျဉ်းသား ၂၄၈၄၆ ဦးနဲ့ နိုင်ငံခြားသားအကျဉ်းသား ၈၇ ဦးရို့ကို လွှတ်ပီးလိုက်စွာဖြစ်ပါရေ။
မြန်မာ့နှစ်သစ်မင်္ဂလာအခါသမယအထိမ်းအမှတ်အားဖြင့်လကောင်း၊ ပြည်သူလူထုနှလုံးစိတ်ဝမ်းအီးချမ်းစီရေးနဲ့ လူစားချင်းစာနာထောက် ထားမှုကိုအလေးထားခြင်းအားဖြင့်လကောင်း ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေပုဒ်မ ၂၀၄၊ ပုဒ်မခွဲ (က) အရ အခုပိုင် လွှတ်ပီးလိုက်စွာ ဖြစ်ပါရေ။
ယင်းအပြင် ဧပြီလ ၁၇ ရက်နိ မတိုင်ခင်မှာ ပြစ်ဒဏ်ခံစားနီရသူတိထဲက သီဒဏ်ကျခံနီရရေလူတိကို လွတ်ရက်မရှိရေ တစ်သက်တစ် ကျွန်းပြစ်ဒဏ်သို့အဖြစ်လကောင်း၊ တစ်သက်တစ်ကျွန်းကျခံနီရရေလူကို အနှစ် ၄၀ သို့လကောင်း၊ အနှစ် ၄၀ ကျခံနီရရေလူကို ၁၀ နှစ်သို့လကောင်း လျော့ပါးရေပြစ်ဒဏ်တိ ပြောင်းလဲပြင်ဆင်ပီးထားစွာ တွိရပါရေ။
နိုင်ငံတော်သမ္မတ ဦးဝင်းမြင့်ကတော့ ကိုဗစ်နိုက်တင်း ကမ္ဘာ့ကပ်ရောဂါကြောင့် မြန်မာရို့၏ အစဉ်အလာကြီးမားရေ အတာသင်္ကြန်ကို လလွတ်လလပ် မကျင်းပကတ်ရစွာကို စိတ်မကောင်းကြောင်းနဲ့ ရောဂါတိုက်ဖျက်ရေးမာ ကူညီကတ်တေ ပြည်သူတိကို ကျေးဇူးတင်ရှိ ကြောင်း ပြောကြားထားပါရေ။
နှစ်ဆန်းတစ်ရက်နိန့် လွတ်ငြိမ်းချမ်းသာခွင့်ထဲမှာ နိုင်ငံရေးအကျဉ်းသားအဖြစ်ထောင်ဒဏ်ကျမှတ်ခံနီရရေ နိုင်ငံရေးသမားတချို့ ပါမ လာခြင်းနဲ့ ကမ္ဘာ့ကပ်ဆိုးကြီးဖြစ်ပေါ်နီချိန်မှာ သောင်းနဲ့ချီရေ လူတိကို အဂုပိုင် လွှတ်ပီးလိုက်တေအပေါ်မာလေ့ ဝေဖန်မှုတိထွက်ပေါ် နီစွာတွိရပါရေ။
523 total views, 1 views today