Arakan Yoma|

တိုက်ပွဲကာလအတွင်း မီးတိုက်ခံခရရေ ရခိုင်ပြည်နယ် ကျောက်တော်မြို့နယ် တင်းမကျေးရွာသားရို့၏ ပြည်နယ် ကောင်စီဘားသို့ တင်ပြချက်မှာ ထူးခြားမှု မရှိသိလို့ တင်းမဆရာတော်က မိန့်ပါရေ။

စစ်ဘေးရှောင်နီရရေ တင်းမကျေးရွာသားတိစွာ ကျေးရွာထဲ ပြန်ပနာနီထိုင်ခွင့်ရဖို့အတွက် မိုင်းရှင်း လင်းပီးဖို့နဲ့ တပ်စွဲထားစွာကို ရုပ်သိမ်းပီးဖို့၊ ပျက်စီးလားရေ အိမ်တိနဲ့ ပညာရေး၊ ဘာသာရေး အဆောက်အဦးတိကို ပြုပြင်မွမ်းမံပီးဖို့၊ ပြန်လည်နီရာချထားရေးအတွက် လိုအပ်စွာတိ ကူညီဆောင်ရွက် ပီးဖို့ တောင်းဆိုထားပါရေ။

ယင်းအပြင် ပျောက်ဆုံးနီရေ ရွာသား ၁၈ ယောက်ကိစ္စကို စုံစမ်းဖော်ထုတ်ပီးဖို့နဲ့ လွတ်လပ်စွာ လားလာခွင့်ရရှိဖို့စရေ အချက်တိလည်း ပါဝင်ပါသိရေ။

ဒေ အချက်တိကို ပြီးခရေ ဧပြီလက တစ်ကြိမ်နဲ့ မေလမှာ တစ်ကြိမ် ပြည်နယ်စီမံအုပ်ချုပ်ရေးကောင်စီကို ကျေးရွာသားတိနဲ့ ကျောင်းထိုင်ဆရာတော်ရို့က စာနဲ့ပါ လူချင်းပါ တွီ့ဆုံပနာ တောင်းဆိုထားကတ်စွာပါ။

အကေလည်း ၂ လလောက်ကြာမြင့်လာပြီးကေ မိုးရာသီယာ ရောက်လာခကေလေ့ တာဝန်ရှိသူတိက လစ်လျူရှုထားဆဲ ဖြစ်တေလို့ ကျေးရွာသား ဦးစောသိန်းက ပြောပါရေ။

တင်းမရွာစွာ ပြီးခရေ ၂၀၂၀ မတ်လအတွင်းက အေအေနဲ့ တပ်မတော်ရို့ တိုက်ပွဲဖြစ်ပွားစွာကြောင့် ဘေးလွတ်ရာ ထွက်ပြေးစိုဉ် အိမ်တိ မီးတိုက်ခံခရစွာပါ။

 55 total views,  2 views today