ရိုးမရေဒီယိုမဂ္ဂဇင်း

အောက်တိုဘာ ၁၁ ။ ။ ရခိုင်ပြည်နယ် မြောက်ပိုင်းဒေသ မောင်တောမြို့မှာ ရခိုင်နှင့် မူဆလင်အမျိုးသမီး အသိုက်အဝန်းနှစ်ခုက အောက်တိုဘာလ ၉ ရက်နေ့မှ ၁၀ ရက်နေ့ထိ နှစ်ရက်တာ ငြိမ်းချမ်းရေး ဆွေးနွေးမှုတစ်ခု ပြုခဲ့ကြသည်။

မတည်မငြိမ်ဖြစ်နေသည့် မောင်တောဒေသကို တည်ငြိမ်အောင် နှစ်ဖက်အမျိုးသမီးများအနေနှင့် မည်သို့ ဆောင်ရွက်ရန် လိုအပ်ပုံ၊ ရခိုင်ပြည်နယ်၏ စီးပွားရေးနှင့် ပတ်သတ်သည့် အကြောင်းအရင်းများ၊ လူကုန်ကူးမှုတိုက်ဖျက်ရေး၊ မိခင်နှင့် ကလေးစောက်ရှောက်မှု စသည့် ကဏ္ဍများကို နှစ်ဖက်အမျိုးသမီးများ ဆွေးနွေးခဲ့ကြခြင်း ဖြစ်ကြောင်း ဆိုသည်။

ဆွေးနွေးပွဲသို့ တက်ရောက်ခဲ့သည့် ရခိုင်အမျိုးသမီးကွန်ယက်ဥက္ကဌ ဒေါ်ညိုအေးက “ဆွေးနွေးတဲ့ ကိစ္စကတော့ ရခိုင်ပြည်နယ်ရဲ့ ချွတ်ခြုံကျနေတဲ့ စီးပွားရေး၊ အခု မငြိမ်မသက်ဖြစ်နေတဲ့ Public Area တွေကို ငြိမ်သွားအောင် သူတို့ဖက်က ဘာလုပ်ကြမယ်။ သူတို့မှာ မိန်းမအချင်းချင်း ပြောကြတာ။ ပြီးတော့ မိခင်နဲ့ ကလေးစောင့်ရှောက်မှု အားနည်းလာတဲ့အခါ နှစ်ဖက်စလုံးမှာ ကြုံရမယ့် ကိစ္စတွေ အမျိုးသမီးနဲ့ သက်ဆိုင်တဲ့ ကိစ္စတွေလို့ ဆိုရမယ်။ အဲဒီလို ဆွေးနွေးကြတာ။”ဟု ပြောသည်။

အဆိုပါ ဆွေးနွေးပွဲကို ဒေသမတည်ငြိမ်မှုများရှိနေသည့် အသိုက်အဝန်းနှစ်ခုကြားမှ မတူကွဲပြားသည့် နှစ်ဖက် အမျိုးသမီးများ ငြိမ်းချမ်းစွာ ယှဉ်တွဲနေထိုင်နိုင်ရန်၊ အမျိုးသမီးအချင်းချင်း လွတ်လပ်စွာတွေ့ဆုံ အမြင်ချင်းဖလှယ် ပူးပေါင်း တိုင်ပင်နိုင်ရန်နှင့်  လူမူသဟဇာတဖြစ်မှုကို မြှင့်တင်နိုင်သည့် အမျိုးသမီးများဖြစ်ရန် စသည့် ရည်ရွယ်ချက်များဖြင့် ကျင်းရခြင်းဖြစ်ကြောင်း သိရသည်။

ဆွေးနွေးပွဲသို့ ရခိုင်နှင့် မူဆလင်အမျိုးသမီးများအပါအဝင် မောင်တောမြို့က ရခိုင်နဲ့ မူဆလင် အသိုင်းအဝိုင်းနှစ်ခုစလုံး၏ အခြေ အနေများကို သွားရောက်လေ့လာနေသည့် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေး ကော်မတီ၏ အကြံပေးအဖွဲ့ဝင် Mr.Roelof Meyer ဦးဆောင်သည့် အဖွဲ့နှင့် မောင်တောမြို့နယ် အထွေထွေအုပ်ချုပ်ရေး ဦးစီးဌာနမှ တာဝန်ရှိသူများ တက်ရောက်ခဲ့ကြောင်း သိရသည်။

ရခိုင်ပြည်နယ်တွင် ရခိုင်နှင့် မူဆလင် ၂၀၁၂ ခုနှစ် ပဋိပက္ခဖြစ်ပွားပြီး နောက်ပိုင်း အသိုင်းအဝိုင်းနှစ်ခုကြား မတည်ငြိမ်မှုများ ရှိလာခဲ့ ခြင်းဖြစ်ပြီး ယခုလို နှစ်ဖက် ငြိမ်းချမ်းရေးဆွေးနွေးခြင်းမှာ ပထမဆုံးအကြိမ်လည်း ဖြစ်သည်။

Leave a Reply

Your email address will not be published. Required fields are marked *