ရိုးမရေဒီယိုမဂ္ဂဇင်း

အောက်တိုဘာလ ၃ ရက်။ ကျွဲနှင့် နွားများကို တစ်ဖက်ဘင်္ဂလားဒေ့ရ်ှနိုင်ငံသို့ ၂၀၁၇ ခုနှစ်၊ အောက်တိုဘာလမှ စတင်၍ တင်ပို့နိုင်ပြီ ဖြစ်ကြောင်း အစိုးရက တရားဝင်ကြေညာခဲ့ပြီး၊ ယင်းနောက်ပိုင်း ၂၀၁၈ ခုနှစ် ဇွန်လမှ စပြီးတင်ပို့ရာ လက်ရှိ အချိန်ထိ ၂၅၅ ကောင်တင်ပို့နိုင်ပြီ ဖြစ်ကြောင်း ရခိုင်ပြည်နယ် မွေးမြူရေးနှင့် ကုသရေးဦးစီးဌာနမှ သိရသည်။

ကျွဲနှင့် နွားတစ်ကောင်စီလျှင် အမေရိကန်ဒေါ်လာ ၁၂၀၀ စီ သတ်မှတ်ထားပြီး ပြီးခဲ့သည့် ဇွန်လနှင့် သြဂုတ်လတို့တွင် အကောင်ရေ ၁၀၀ စီနှင့် စက်တင်ဘာလတွင် ၅၅ ကောင် စုစုပေါင်း အကောင်ရေ ၂၅၅ ကောင် တင်ပို့ခဲ့ခြင်းဖြစ်သည်။

“အရင်နှစ်တွေကတော့ မပို့ဖြစ်ခဲ့ဘူး။ အခု ခြောက်လပိုင်းမှာ စပြီး ပို့တာပေါ့နော်။ အားလုံးပေါင်း သုံးကြိမ်ပဲပို့ရသေးတယ်။ အခွန် ဘဏ္ဍာငွေ ရအောင်ဆိုပြီးတော့ တရားဝင် တင်ပို့နိုင်အောင် ကြိုးစားနေကြတယ်ပေါ့နော်။ အခုက စမ်းသပ်ကာလဖြစ်နေလို့ပေါ့။ တရားဝင်သတ်မှတ်တာက အမိန့်ကြေညာတာ ရှိတယ်လေ။ အခု အောက်တိုဘာလဆိုရင် တစ်နှစ်ပြည့်ပြီပေါ့။”ဟု မွေးမြူရေးနှင့် ကုသရေး ဦးစီးဌာနက ရခိုင်ပြည်နယ် ဦးစီးမှူး ဒေါက်တာသန်းနိုင်က ပြောသည်။

ထိုသို့ တင်ပို့ရာတွင် အသက် ၅ နှစ်နှင့် အထက် မျိုးမပွားနိုင်တော့သည့် သင်းခွဲပြီးသား အထီးများကိုသာ သီးသန့် တင်ပို့ခြင်းဖြစ် ကြောင်း၊ မျိုးရိုးထိန်းသိမ်းသည့်အနေဖြင့် အမများကို တင်ပို့မှု မပြုကြောင်းနှင့် တစ်ကြိမ်ပို့လျှင် အကောင်ရေ ၁၀၀ နှင့် အထက် တင်ပို့ရန် ခွင့်ပြုမထားကြောင်း ဆိုသည်။

လတ်တလောတွင် မာန်အောင်မြို့နယ်မှ ကုမ္ပဏီနှစ်ခုက တင်ပို့နေခြင်းဖြစ်ပြီး တစ်ခြားကုမ္ပဏီများအနေဖြင့် တင်ပို့မည်ဆိုလျှင် လည်း ကုမ္ပဏီမှတ်ပုံတင် ရှိရမည်ဖြစ်ကြောင်း သိရသည်။

Leave a Reply

Your email address will not be published. Required fields are marked *